Kolviður fæddist okkur árið 2012 og er undan Akk frá Vatnsleysu og Kolbrá frá Miðfelli. Akkur er undan Glampa frá Vatnsleysu og Alísu sem fékk á sínum tíma 9,5 fyrir tölt, brokk og fegurð í reið. Kolbrá er undan Flosa frá Brunnum og sammæðra Dimmu frá Miðfelli sem hefur gefið gæðinga, þar á meðal Dívu frá Álfhólum með 10 fyrir tölt.
Kolviður var strax veturgamall mjög stór og þegar hann var 1,5 vetra var hann orðinn stærsti hesturinn í stóðinu. Nú er hann á sjötta vetur og yfir 150 cm á herðar. Þar að auki er hann mjög myndarlegur og líst okkur vel á ganginn í honum. 
Kolviður varð til í ræktunartilraun sem við gerðum árið 2011 þegar við fengum Akk frá Vatnsleysu lánaðan í Hornafjörðinn (þar sem við bjuggum á þeim tíma) og leiddum undir hann hornfirskar hryssur. Málin þróuðust síðar þannig að við eignuðumst hlut í Akk og höfum haldið áfram að halda undir hann hornfirsku hryssunum okkar, þar sem okkur líst vel á útkomuna (grein um það væntanleg).
Það verður að viðurkennast að það hefði verið gaman að hafa Kolvið í hornfirsku ræktuninni, en við eigum til systur hans (sammæðra) sem fer aftur undir Akk í sumar. Þannig að við fáum vonandi svipaðan einstakling til undaneldis :)  
Kolviður er einstaklega geðgóður með mjög efnilegt tölt. Líklegast er hann alhliðahestur. Vegna stærðarinnar höfum við farið okkur hægt í tamningu og þjálfun á Kolvið og gefum honum nægan tíma. Nú fer hann aftur í frí yfir æðarvarpstímann og kemur aftur inn eftir það.

kolvidur13

kolvidur14